ودي بقى قصتي😊:

من ساعة ما ربنا رزقني ببنتي الكبيرة، وأنا بحاول أبقى الأم  المختلفة اللي فاهمة بناتها وقادرة تتعامل معاهم كويس.. الموضوع مكانش سهل عليا أبدا، لأني لقيت نفسي بكرر نفس اللي بشوفه حواليا من أساليب التربية واللي مجابتش النتيجة اللي أنا عايزاها خالص.. واكتشفت إن الموضوع مش خبرة بكتسبها مع مرور الأيام، لأنها ممكن تبقى خبرة مبنية على أساس خاطيء.. بس أصريت إني لازم أدرس ازاي أربي بناتي وازاي أفهمهم وأتعامل مع مشاعرهم وسلوكياتهم صح..

ولأن كمان شغلي الأساسي في طب الأسنان مع الطالبات البنات من ٢٠٠٩، ولأني شغلت مناصب قيادية وإدارية كتير في الكلية، ده خلاني أتعامل مع فترات حياتية وأعمار مختلفة كتير للبنات، وبالتالي أفهمهم في مختلف أعمارهم وحالاتهم..
بشتغل في التدريس من سنة ١٩٩٨.. وفي الأول، مكانش بيشغل دماغي غير إني أعلمهم كويس و بس، لما أخدت الدكتوراة و تخففت شوية من إعصار تحضير رسالتي الماجيستير و الدكتوراة، ابتديت أنتبه لإني مش بس المفروض إني أعلّم طالباتي أسنان، لأ.. أنا كمان المفروض أعلمهم الحياة😍..

و فعلا، كنت بخصص جزء من محاضراتي للمهارات الحياتية.. ازاي يتواصلوا، ازاي ينظموا وقتهم، ازاي يعبروا عن مشاعرهم.. ازاي ينتبهوا إن فيه حياة تانية مش أكاديمية.. ازاي يطوروا نفسهم ك بني آدمين.. مش بس كدكاترة.. و بفضل الله الكورسات و الشهادات اللي أخدتها ساعدتني كتير في ده..

أنا معتمدة من مؤسستين تربية معروفتين في الولايات المتحدة👩‍🎓.. والشهادات دي أنا كنت باخدها لنفسي في الأول، علشان أعرف أتواصل مع بناتي و أفهمهم بشكل أفضل.. لأني حسيت ان التربية مش سهلة وانها أعمق بكتير من اللي أنا بعمله.. و الحمد لله ربنا وفقني ولقيت اللي بدور عليه في ( hand in hand parenting by connection).. .. ازاي المخ بيشتغل وهتعملي ايه لما تلاقي نفسك في لحظة عاجزة عن التصرف… فهم عميق جدا للمشاعر في المواقف المختلفة وبالتالي رد فعلك بيبقى مناسب…

انا درست التربية بالتواصل أكتر من سنة أكاديمية كاملة علشان هما بيؤهلوا المدربين انهم يبقوا فعلا فاهمين بعمق ويقدروا يساعدوا الأمهات بسهولة، وهو ده نظام مؤسسة ( hand in hand)، اني لازم أمر بمراحل كتير ومقابلات ومذاكرة وامتحانات وواجبات علشان ابقى معتمدة….

ولأن الطريقة دي مبنية على علم الأعصاب🧠 وعلى أبحاث دكاترة نفسيين كتير، وبصفتي باحثة بحب أعرف دايما ايه العلم اللي ورا الأشياء (the science behind) ، ده بيديني رؤية أصح وأعمق…

و علشان احنا عايشين في زمن فتن كتير، و الضغوط اللي حوالين البنات (وأكيد الولاد بردو ) بقت كتيرة.. و علشان أنا مقتنعة إن لما العلم يجتمع مع الخبرة، الموضوع بيفرق جدا، قررت إني أتكلم عن تربية البنات في زمن الفتن والتحديات الكتيرة اللي احنا بقينا عايشين فيها.. زي بالضبط لو حد بيدرس للطلبة بتوعه جراحة و هو عمره ما عمل عملية بنفسه، أكيد وصوله للطلبة بتوعه مش هيبقى زي دكتور إيده في العمليات طول الوقت و عارف لما التكنيك ده يفشل، يبقى ذهنه حاضر إنه يجرب التكنيك التاني على طول..

و بفضل الله أقدر أفيد الأمهات اللي عندهم بنات في مشاكل دقيقة تخصهم.. علشان كده أنا اخترت إني أكتب عن تربية البنات في زمن الفتن..
• مدربة معتمدة من مؤسسة Hand in Hand  للتربية بالتواصل.
• لايف كوتش معتمد من اتحاد الكوتشينج الدولي ICF..
• كوتش علم النفس الإيجابي..
• أستاذ في كلية طب الأسنان..
• وكيل الكلية لشئون التعليم والطلاب السابق..
• دبلوما تعديل السلوك من جامعة نوتنج هيل البريطانية..
• دبلوما العلاج المعرفي السلوكي من جامعة نوتنج هيل البريطانية
• حاصلة على اعتماد جامعة كامبريدج البريطانيه كمدربه دولية..
• دبلوما البرمجة اللغوية العصبية من INLPTA.
• دبلوما التسويق الالكتروني digital marketing من الغرفة الكندية.
• رئيس تحرير المجلة العلمية للكلية..
• كورس سبرنج بورد- التطوير الذاتي للمرأة